Химийн томьёог хэрхэн зохиодог вэ?
Ионы нэгдэл саармаг байдаг: катионуудын нийт эерэг цэнэг анионуудын нийт сөрөг цэнэгтэй тэнцэнэ. Томьёоны индекс энэ тэнцвэрийг хангана. Индексийг олох хамгийн хялбар арга бол валент солбих юм.
- Хоёр ионоо цэнэгтэй нь бич: Al3+ ба O2−.
- Цэнэгийн тоог солбиж индекс болго: хөнгөн цагаан 2, хүчилтөрөгч 3 индекс авч Al2O3 болно.
- Индексүүд нийтлэг хуваагчтай бол хамгийн бага бүхэл тоо болтол багасга: Mg2+ ба O2− ионоос Mg2O2 биш, MgO гарна.
- Индекс 1 бол бичихгүй.
- Олон атомт ион нэгээс олон орвол хаалтад ав: Ca(OH)2, Fe2(SO4)3.
| Катион | Анион | Томьёо | Нийт цэнэг | Нэр |
|---|---|---|---|---|
| Na+ | Cl− | NaCl | 1+ ба 1− | натрийн хлорид |
| Mg2+ | O2− | MgO | 2+ ба 2− | магнийн оксид |
| Al3+ | O2− | Al2O3 | 6+ ба 6− | хөнгөн цагааны оксид |
| Ca2+ | OH− | Ca(OH)2 | 2+ ба 2− | кальцийн гидроксид |
| Fe3+ | SO₄²⁻ | Fe2(SO4)3 | 6+ ба 6− | төмрийн(III) сульфат |
| Ca2+ | PO₄³⁻ | Ca3(PO4)2 | 6+ ба 6− | кальцийн фосфат |
Томьёогоо Nalukh chem аппаас угсраарай
Энэ симулятор бүтэн эрхэд багтдаг. Татах нь үнэгүй, бүртгэлгүйгээр 2 бүлэг, 5 симулятор нээлттэй.
Симуляторыг хэрхэн ашиглах вэ?
Симулятор нээгдэхэд Li+ ба F− сонгогдсон байна.
- Зүүн талын КАТИОН (+) баганаас катион сонгоно. Төмөр хоёр мөртэй: Fe2+ ба Fe3+.
- Баруун талын АНИОН (−) баганаас анион сонгоно.
- Голын самбарын дээд хэсэгт хоёр ионы цэнэг, тэдгээрийг солбисон сум харагдана.
- Доор нь томьёо, нэгдлийн нэр, ангилал гарна: оксид, суурь, хүчил, давс эсвэл ус.
- Хамгийн доод мөр цэнэгийг шалгана. Жишээ нь Al2O3 нэгдэлд 2 × 3+ = 6+, 3 × 2− = 6− гэж гарч, хажууд нь ✓ тэнцэв бичигдэнэ.
Симулятор дээр оролдож үзэх даалгавар
Томьёогоо эхлээд дэвтэртээ бичээд, дараа нь симулятортой тулга.
- Mg2+ ба нитрид N3− ионоос томьёо зохио. Хариу: Mg3N2, нийт цэнэг 6+ ба 6−.
- Fe2+, Fe3+ ионыг сульфат ионтой ээлжлэн холбо. Хариу: FeSO4 төмрийн(II) сульфат, Fe2(SO4)3 төмрийн(III) сульфат.
- Аммони NH₄⁺, сульфат SO₄²⁻ ионоос томьёо зохио. Хаалт яагаад гарсан бэ? Хариу: (NH4)2SO4, учир нь хоёр аммони ион орсон.
- Катионыг устөрөгч болгоод анионыг хлорид, сульфат, фосфат болгож соль. Хариу: HCl, H2SO4, H3PO4, ангилал нь хүчил.
Түгээмэл алдаа
- Индекс багасгахаа мартах. Ca2+ ба O2− ионоос Ca2O2 биш, CaO гарна.
- Хаалт орхих. Ca(OH)2 нэгдэлд хоёр OH− ион байгаа. CaOH2 гэж бичвэл буруу.
- Ионы дотоод индексийг өөрчлөх. SO₄²⁻ ионы 4 бол ионы өөрийн найрлага тул хэвээр үлдэнэ.
- Цэнэг тэнцсэн бүх томьёог бодит бодис гэж бодох. Симулятор зөвхөн цэнэгийг тооцно. Жишээ нь Al2(CO3)3 томьёо цэнэгээрээ зөв боловч ийм бодис усанд задардаг.
