Энерги ямар хэлбэртэй байдаг вэ?
Энерги алга болдоггүй, шинээр үүсдэггүй, зөвхөн нэг хэлбэрээс нөгөөд хувирдаг. Химид хамгийн чухал нь бодисын химийн холбоонд хадгалагддаг химийн энерги юм.
| Хэлбэр | Жишээ |
|---|---|
| Химийн | Түлш, хоол хүнс, батарейд хадгалагдана |
| Дулааны | Мод шатахад ялгарч, гэрийг дулаацуулна |
| Гэрлийн | Магни шатахад цагаан гэрэл гарна |
| Цахилгаан | Батарейн химийн энерги гүйдэл болж чийдэн асаана |
| Механик | Хөдөлгүүрт бензин шатаж, машин хөдөлнө |
Энэ симулятор дулааны энергид төвлөрдөг: дулаан нэг биетээс нөгөөд хэрхэн дамжихыг харуулна.
Дулаан хэрхэн дамждаг вэ?
Хүрэлцсэн хоёр биетийн хооронд дулаан үргэлж халуун биетээс хүйтэн рүү дамжина. Температур тэнцмэгц дулаан дамжихаа болино.
Бодис бүр өөрөөр халдаг. 1 г бодисыг 1°C-аар халаахад шаардлагатай дулааныг хувийн дулаан багтаамж (c) гэнэ. Ус 4.2 Ж/(г·°C), төмөр 0.45 Ж/(г·°C) тул ижил масстай бол ус төмрөөс 9 дахин орчим их дулаан шаардана. Дулааны хэмжээг Q = m · c · Δt томьёогоор бодно: 100 г усыг 10°C-аар халаахад 4200 Ж хэрэгтэй.
Дулааны туршилтыг Nalukh chem аппаас хийгээрэй
Энэ симулятор бүтэн эрхэд багтдаг. Татах нь үнэгүй, бүртгэлгүйгээр 2 бүлэг, 5 симулятор нээлттэй.
Симуляторыг хэрхэн ашиглах вэ?
Симулятор нээгдэхэд зүүн блок нь 20° төмөр, баруун блок нь 80° ус байна. Блок бүрийн хажууд термометр, дотор нь дөрвөлжин тэмдэг бий. Блок халах тусам дөрвөлжин олширно.
- Блок А мөрөөс зүүн блокийн материалыг сонгоно: Төмөр, Тоосго эсвэл Ус. Баруун блок үргэлж ус.
- Шатаагч мөрөөс А эсвэл Б товчоор шатаагчийг аль блокийн доор тавихаа сонгоно.
- Доод гулсуурыг Халаах тал руу татвал блок халж, Хөргөх тал руу татвал хөрнө. Голд нь тавибал шатаагч унтарна.
- ✂ Салгах товчийг дарвал хоёр блок хүрэлцэж, товч дээр 🔗 Хамт гэж бичигдэнэ. Температур өөр бол халуун блокоос хүйтэн рүү сум гарна.
- Дээд буланд байгаа сэргээх товч бүгдийг анхны байдалд нь буцаана.
Симулятор дээр оролдож үзэх даалгавар
Дараагийн туршилтын өмнө сэргээх товчийг дараарай.
- Төмөр, усыг хүрэлцүүлээд температур тэнцэхийг хүлээ. Хариу: 68°. Төмөр 48°-аар халж, ус 12°-аар хөрнө.
- Блок А мөрөөс Тоосго сонгож давт. Хариу: 60°.
- Блок А мөрөөс Ус сонгож давт. Хариу: 50°, хоёр температурын яг дундаж.
- Эцсийн температурыг өөрөө бод. Симулятор дулаан багтаамжийг харьцангуй тоогоор авдаг: төмөр 1, тоосго 2, ус 4. Төмрийн хувьд (1 · 20 + 4 · 80) ÷ (1 + 4) = 68°.
- Гулсуурыг бүрэн Халаах тал руу татаж, зүүн блокийг 20°-аас 60° хүртэл халаах хугацааг төмөр, усаар хэмж. Хариу: ус 4 дахин удаан халана.
Симулятор ба бодит байдал
Симулятор бол хялбаршуулсан загвар. Усны блок 0°C-т хөлдөхгүй, 100°C-т буцлахгүй. Дөрвөлжин тэмдгийн тоо зөвхөн температураас хамаарна, харин бодит биетийн дулаан нь масс, дулаан багтаамжаас ч хамаарна. Төмөр, усны дулаан багтаамжийн харьцаа ч бодитоор 4 биш, 9 орчим.
Усны дулаан багтаамж их тул халаалтын шугамаар ус урсгадаг: ус их дулаан зөөж, удаан хөрдөг.
