Хийн даралт гэж юу вэ?
Хийн бөөмс тасралтгүй, хурдан хөдөлж савны ханыг байнга мөргөдөг. Нэг мөргөлтийн хүч маш бага боловч мөргөлтийн тоо асар олон. Энэ олон мөргөлтөөс ханын нэгж талбайд ногдох түлхэлтийг даралт гэнэ. Даралтын нэгж нь паскаль (Па). 1 атм ойролцоогоор 101 кПа-тай тэнцүү.
Савны хийн даралт гурван зүйлээс хамаарна: бөөмсийн тоо, температур, эзлэхүүн. Энэ симулятор эзлэхүүний нөлөөг харуулна.
Бойлийн хууль гэж юу вэ?
Температур ба хийн хэмжээ тогтмол үед даралт эзлэхүүнтэй урвуу хамааралтай. Даралт ба эзлэхүүний үржвэр өөрчлөгддөггүй:
P1 · V1 = P2 · V2
| Эзлэхүүн | Даралт |
|---|---|
| 2 дахин багассан | 2 дахин ихэссэн |
| 3 дахин багассан | 3 дахин ихэссэн |
| 2 дахин ихэссэн | 2 дахин багассан |
Жишээ. 100 кПа даралттай 3 л хийг температур өөрчлөхгүйгээр 1 л болтол шахав. Даралт хэд болох вэ? 100 · 3 = P2 · 1, иймд P2 = 300 кПа.
Яагаад ингэдэг вэ? Температур тогтмол тул бөөмсийн хурд өөрчлөгдөхгүй. Харин хана хоорондын зай багасаж, бөөм бүр ханыг илүү олон удаа мөргөнө.
Бүлүүрийг Nalukh chem аппаас шахаж үзээрэй
Гулсуураар эзлэхүүнийг өөрчилж, даралтын тоог харна. Энэ симулятор бүтэн эрхэд багтдаг. Татах нь үнэгүй, бүртгэлгүйгээр 2 бүлэг, 5 симулятор нээлттэй.
Симуляторыг хэрхэн ашиглах вэ?
- Эхэнд бүлүүр савны баруун захад байрлаж, даралт 55 гэж харагдана.
- Эзлэхүүн гулсуурыг зүүн тийш чирнэ. Бүлүүр зүүн тийш явж, хийн эзлэх зай багасна.
- Гарчгийн доорх даралтын тоог харна. Даралт ихсэх тусам бүлүүрийн өнгө улаан болно.
- Гулсуурыг баруун тийш буцаавал бүлүүр ухарч, даралт багасна.
Дэлгэц дээрх даралт нэгжгүй, харьцуулах тоо. Бөөмсийн тоо, хурд өөрчлөгдөхгүй тул Бойлийн хуулийн нөхцөл биелнэ.
Симулятор дээр оролдож үзэх даалгавар
- Гулсуурыг хамгийн зүүн тал руу аваач. Хамгийн их даралт хэд вэ? Хариу: 157.
- Даралтыг 110 болго. Бүлүүр хаана байна? Хариу: савны яг голд. Эзлэхүүн 2 дахин багасаж, даралт 55-аас 2 дахин ихэссэн.
- Бойлийн хуулиар бод: даралт 157 үед хий анхны эзлэхүүнийхээ хэдэн хувийг эзлэх вэ? Хариу: 55 ÷ 157 ≈ 0.35, өөрөөр хэлбэл 35%.
Бойлийн хууль хаана хэрэглэгддэг вэ?
- Шахуурга. Бүлүүрийг дарахад цилиндр доторх агаарын эзлэхүүн багасаж, даралт ихэснэ. Тэгээд агаар дугуй руу орно.
- Тариур. Үзүүрийг хуруугаараа таглаад бүлүүрийг дарахад шахагдсан агаар бүлүүрийг буцааж түлхэнэ.
- Амьсгал. Амьсгаа авахад цээжний хөндий томорч, уушгин доторх даралт багасна. Иймд агаар уушги руу орно.
Хийг халаахад даралт хэрхэн өөрчлөгдөхийг энэ симулятор харуулдаггүй. Шарлийн хуулиар эзлэхүүн тогтмол үед температур ихсэхэд даралт ихэснэ. Үүнийг Хийн хуулиуд симулятор дээр үз.
